Mini Philosophie
Dini Idee, mis Handwärk: Du hesch e Vision? I gstaute dini Wunschmotiv, Logos oder Sprüch uf em Pc u brönne se vo Hang präzis uf ds Houz.
100% Handarbeit: Jedes Motiv brönneni Linie für Linie vo Hang ids Materiau – ganz ohni Laser oder Maschine.
Natur mit Charakter: I wähle jedes Houzstück sorgfäutig us. Die natürlechi Maserig macht Dis Stück zum absolute Einzustück.
Über mi u mis Handwärk
I bi Tamara Feybli, bi 43i u wohne im schöne Langnou im Ämmitau. Hinger Brandwärk steckt mini grossi Lideschaft für d’Natur, d’Heimat u es urauts Handwärk. Bi mir gits keni computergstüreti Laser u kener fliessbandgfertigti Masseprodukt. Jedes Stück, wo mini Wärkstatt verlaht, isch ehrlechi, ächti Handarbeit – Strich für Strich u Punkt für Punkt.
Wie aues agfange het…
Houz het mi scho immer fasziniert. D’Struktur, dr Gruch u d’Gschicht, wo i jedem Jahresring steckt. E Boum isch für mi meh aus nume Materiau. Wo i ds erschte Mau e glühende Brönnstift i de Finger ha gha, hets mi packt. Ds Gspür, wie us ere fine Rouchwuche u heisser Gluet ufem rohe Houz e lebändegi Form ensteit, isch für mi pure Zouber u macht mer eifach Fröid.
Tamara Feybli
Mini leischtige u Produkt
Hochzit u Liebi: Ruschtikali Houzschibe mit Name u Hochzitsdatum aus blibendi Erinnerig.
Familie u Fescht: Personalisierti Zmorgebrättli, Baby- Erinnerigstafele oder Schilder für Hus u Garte.
Gastronomie: Einzigartigi, ibrönnti Logos uf houzige Spiischartene oder Servierbrättli.
Chundegschänk: Hochwärtigti Präsent us Houz wo e blibende Idruck hingerlöh.
Fründe u Familie: Mitbringsu zum Geburtstag, Jubiläum, Beärdigung oder eifach so
4 Schritte zu dim Unikat:
1. Dini Idee: Du mäudisch Di bi mir mit Dire Idee, emne Wunschtext oder es Foto.
2. Dr Entwurf: I gstaute d’Vorlag u mir bearbeite d’Details, bis es für Di perfekt passt.
3. Mit Füür u Flamme: I brönne Dis Motiv Linie für Linie vo Hang ids Houz.
4. D’Fröid: Dis fertige Brandwärk-Unikat chunnt per Poscht zu Dir hei oder Du chasch es abhole.
Jedes Stück Houz isch es Unikat – genau wie Du.
Dini Idee.Mis Handwärk. Dis Unikat.
Galerie
